പേരാമ്പ്രയിൽ വീണ്ടും വൻ മയക്കുമരുന്ന് വേട്ട: മൂന്ന് പേർ പിടിയിൽ

പേരാമ്പ്ര: പേരാമ്പ്രയിൽ വീണ്ടും വൻ മയക്കുമരുന്ന് വേട്ട. റൂറൽ ജില്ലാ പൊലീസ് മേധാവി മെറിൻ ജോസഫ് ഐപിഎസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ ജില്ലാ നർക്കോട്ടിക് സെൽ ഡിവൈഎസ്പി ടി. ഉത്തംദാസിന്റെ നേതൃത്വത്തിലുള്ള ഡാൻസാഫ് സ്ക്വാഡ് നടത്തിയ പരിശോധനയിലാണ് മൂന്ന് പ്രധാന ലഹരി വിതരണക്കാർ പിടിയിലായത്.

കർണാടക തച്ചക്കര സ്വദേശി മുഹമ്മദ് യാസിൻ (24), കോഴിക്കോട് ചേരാപുരം സ്വദേശികളായ പുത്തൻപുരയിൽ മുഹമ്മദ് തസ്നീം (34), പിലാക്കൂൽ സിറാജ് (42) എന്നിവരാണ് അറസ്റ്റിലായത്.

മലബാർ മേഖലയിലെ വിവിധ സ്ഥലങ്ങളിലെ പ്രധാന രാസലഹരി വിതരണക്കാരാണ് ഇവരെന്ന് പൊലീസ് പറഞ്ഞു. ഇവർക്ക് അന്തർദേശീയ ലഹരി സംഘങ്ങളുമായി ബന്ധമുണ്ടെന്ന സംശയത്തിൽ അന്വേഷണം തുടരുകയാണ്. ആറ് മാസത്തോളമായി ഓപ്പറേഷൻ തൂഫാന്റെ ഭാഗമായി ഇവരെ നിരീക്ഷിച്ചുവരികയായിരുന്നു.

ബാംഗ്ലൂരിൽ നിന്ന് കോഴിക്കോട്ടേക്ക് ലഹരി എത്തിച്ച് വിൽപ്പന നടത്തുന്നതിനിടെ ഇന്നലെ രാത്രി വാല്യക്കോട് മുളിയങ്ങല്‍ കനാൽ റോഡിൽ വെച്ച് ഡാൻസാഫ് സംഘം ഇവർ സഞ്ചരിച്ച കർണാടക റെജിസ്‌ട്രേഷന്‍ വാഹനമായ KA.53.MD.5418 നമ്പർ ക്രെറ്റ കാർ തടഞ്ഞുനിർത്തി പരിശോധിച്ചു.

Also read: ചെറുവണ്ണൂര്‍ ചാത്തോത്ത് മീത്തല്‍ മൊയ്തി അന്തരിച്ചു

വാഹനത്തിന്റെ ഡാഷ്ബോർഡിൽ നിന്ന് 51.432 ഗ്രാം എംഡിഎംഎയും സീറ്റിനടിയിൽ കവറിൽ ഒളിപ്പിച്ച നിലയിൽ 8.5 ലക്ഷം രൂപയും കണ്ടെടുത്തു. ബാംഗ്ലൂരിൽ നിന്നും ഡൽഹിയിൽ നിന്നുമാണ് ഇവർ പ്രധാനമായും ലഹരി എത്തിക്കുന്നത്.

കോഴിക്കോട്, മലപ്പുറം, വയനാട് ജില്ലകളിലെ മൊത്തവിതരണക്കാരാണ് പ്രതികൾ. പ്രധാനമായും സ്ത്രീകളെയും പെൺകുട്ടികളെയും വിൽപ്പനക്കായി ഉപയോഗിക്കുന്നതായും പൊലീസ് പറഞ്ഞു.

ആഡംബര കാറുകൾ വാടകക്ക് എടുത്തും യുവതികളെയും യുവാക്കളെയും ശൃംഖലയിൽ ചേർത്തുമാണ് വിൽപ്പന നടത്തിയിരുന്നത്. മുൻപ് വിദേശത്തുണ്ടായിരുന്ന തസ്നീം സാമ്പത്തികമായി തകർന്നതിനെ തുടർന്നാണ് പെട്ടെന്ന് പണം ഉണ്ടാക്കാൻ ലഹരി വിൽപ്പന ആരംഭിച്ചതെന്ന് പൊലീസിനോട് സമ്മതിച്ചു.

തസ്നീമും സിറാജും കോഴിക്കോട് ജില്ലയിലെ കുപ്രസിദ്ധ ലഹരി വിൽപ്പനക്കാരാണെന്നും വിവരമുണ്ട്. എസ്ഐമാരായ വിനീത് വിജയൻ, രാജീവ് ബാബു, എഎസ്ഐമാരായ വി.വി ഷാജി, സി.എം സുനിൽ കുമാർ, വി.സി ബിനീഷ്, എൻ.എം ജയരാജൻ, വി സദാനന്ദൻ, എസ് സിപിഒമാരായ പി.പി ജിനീഷ്, പി.കെ അനസ്, സിപിഒമാരായ അനൂപ് സെൻ, ഒ.എം റിജേഷ്, ഇ.കെ അഖിലേഷ്, ഡി.ബി ലിധിൻ, മിഥുൻ മോഹൻ എന്നിവരടങ്ങിയ സംഘമാണ് പ്രതികളെ പിടികൂടിയത്.

ജില്ലയിൽ ഓപ്പറേഷൻ തൂഫാന്റെ ഭാഗമായി കർശന പരിശോധന തുടരുമെന്ന് ഡിവൈഎസ്പി ഉത്തംദാസ് അറിയിച്ചു.

Content Highlight: Perambra Major Drug Bust: 3 Arrested with 51g MDMA and Rs 8.5 Lakh in Kozhikode

#Perambra drug bust #MDMA seizure #DANSAF Operation Thoofan #Merin Joseph IPS #narcotics arrest