പേരാമ്പ്ര: സംസ്ഥാനത്ത് തുടരുന്ന വൈദ്യുതി പ്രതിസന്ധിക്കും പവര് കട്ടിനുമെതിരെ ഡിവൈഎഫ്ഐ. പേരാമ്പ്ര ബ്ലോക്ക് കമ്മിറ്റിയുടെ നേതൃത്വത്തില് കെഎസ്.ഇ.ബി. ഓഫീസിലേക്ക് പ്രതിഷേധ മാര്ച്ച് നടത്തി.
പത്തുവര്ഷത്തെ ഇടവേളയ്ക്കുശേഷം വൈദ്യുതി നിയന്ത്രണം ഏര്പ്പെടുത്തിയതിലൂടെ ജനജീവിതം ദുസ്സഹമായതായി ആരോപിച്ചായിരുന്നു പ്രതിഷേധം. ഡിവൈഎഫ്ഐ. കോഴിക്കോട് ജില്ലാ വൈസ് പ്രസിഡന്റ് എം.എം. ജിജേഷ് മാര്ച്ച് ഉദ്ഘാടനം ചെയ്തു.
വൈദ്യുതി മുടക്കം ജനജീവിതത്തെ സാരമായി ബാധിക്കുന്ന സാഹചര്യമാണ് നിലവിലുള്ളതെന്നും, ലോകകപ്പ് ഫൈനല് പോലുള്ള നിര്ണായക സമയങ്ങളില്പ്പോലും വൈദ്യുതി തടസ്സം നേരിടേണ്ടിവരുന്നത് പ്രതിഷേധാര്ഹമാണെന്നും, മുന്കാലങ്ങളില് വൈദ്യുതി ഉല്പ്പാദനം കുറവായിരുന്ന ഘട്ടങ്ങളിലും ജനങ്ങള്ക്ക് ബുദ്ധിമുട്ടുണ്ടാകാത്ത രീതിയില് കാര്യങ്ങള് കൈകാര്യം ചെയ്തിരുന്നുവെന്നും, നിലവിലെ പ്രതിസന്ധിയില് പരിഹാരം കാണാന് മുഖ്യമന്ത്രിയോ വൈദ്യുതി മന്ത്രിയോ തയ്യാറാകുന്നില്ലെന്നും, ഓണപ്പരീക്ഷ അടുത്തിരിക്കെ വൈദ്യുതി മുടക്കം വിദ്യാര്ഥികളുടെ പഠനത്തെ പ്രതികൂലമായി ബാധിക്കുമെന്നും, ആരോഗ്യ മേഖലയെയും വ്യാപാരികളെയും ചെറുകിട സംരംഭകരെയും പ്രതിസന്ധിയിലാഴ്ത്തുകയാണെന്നും അദ്ദേഹം പറഞ്ഞു.
ബ്ലോക്ക് പ്രസിഡന്റ് കെ.വി. അനുരാഗ് അധ്യക്ഷത വഹിച്ചു. സര്ക്കാര് അടിയന്തരമായി പ്രശ്നപരിഹാരത്തിന് തയ്യാറാകാത്ത പക്ഷം ശക്തമായ പ്രക്ഷോഭ പരിപാടികളുമായി മുന്നോട്ടുപോകുമെന്നും, നിലവിലെ മാര്ച്ച് മുന്നറിയിപ്പ് സമരമാണെന്നും അവര് വ്യക്തമാക്കി.
ബ്ലോക്ക് ജോയിന്റ് സെക്രട്ടറി അതുല്ദാസ്, ബിനില്, അസിന് ബാനു തുടങ്ങിയവര് സംസാരിച്ചു. ബ്ലോക്ക് സെക്രട്ടറി സി.കെ. രൂപേഷ് സ്വാഗതം പറഞ്ഞ ചടങ്ങില് ബ്ലോക്ക് എക്സിക്യൂട്ടീവ് അംഗം അഖിലേഷ് നന്ദിയും പറഞ്ഞു.
Content Highlight: Power crisis: DYFI marches to KSEB office perambra
.jpg)
